«Мың алғыс» қайырымдылық кешінде 3 миллионға жуық қаржы жиналды

10:23, 28 ақпан 2018   435

   Қазақ радиолары ұйымдастырған «Мың алғыс» қайырымдылық кешінен 3 миллионға жуық қаржы жиналды. Жиналған қаржы туғаннан көзі көрмейтін 1 жасар Арманның еміне беріледі деп жоспарланған.

   Арманның анасы Меруерт Айдарәлиева өткен жылдың қыркүйек айында «Жан жылуы» бағдарламасына хабарласып, глаукома су қараңғылық диагнозы баласы үшін көмек сұраған болатын.

   Петербург мамандары Арман Ардақұлына ота жасауға дайын. Алайда, қолдың қысқалығы, кішкентайдың көруіне қолбайлау болған.

   «Санкт-Петербургтегі кішкентай балаларға ота жасай алады екен, Арманды әкеліңіз деп отыр. Бір көзіне 2 миллиондай кетеді. Соған менің баламның ең болмаса бір көзі көрсе екен деген арманым бар. Сол үшін сіздерден көмек сұраймын. Қазақ радиосы үмітімді ақтады. Бүгінгі концертте осындай қуанышқа кенелемін деп ойламадым. Барлығы үшін алғысымды білдіремін»,- дейді Меруерт Айдарәлиева.

   2 сағатқа созылған қайырымдылық шарасында жомарт жандар аз болмады. Болатбек Жоланұлы есімді кәсіпкер Арманның Петербургке барып келуіне қажет жол билеттерін алып беруге уәде етті.

   Ал белгілі исламтанушы, ғалым  Қайрат Жолдыбайұлы мен Шымкентік кәсіпкер, «Ернияз» компаниясының бас директоры Ербол Дайраш көмекке зәру отбасына 2 млн теңге берді.

   Ал қайырымдылық кешін тамашалауға келген халықтан 700 мың теңге жиналды. Бұл қаражатты Қазақ радиосының ұжымы ертең қолдауға зәру отбасына табыстайтын болады.

   Айта кетейік, «Жан жылуы» бағдарламасының «Қазақ радиосы» эфиріне шыққанына 9 ай болды. Осы уақыт ішінде бағдарлама 5 баланың шетелде ем алуына, 1 көп балалы отбасының 3 бөлмелі пәтерге ие болуына септігін тигізді. Көмекке мұқтаж жандарға «Қазақ радиосының» тыңдаушылары тарапынан 33 млн теңгеден астам қайырымдылық жасалды.

 

Шалқар радиосы

Байланыс телефондары:

«Шалқар» радиосының 50 жылдығы қайырымдылық шараларымен өтуде

Қазақ халқының мәдени, рухани құндылықтарын насихаттау арқылы ұлттың үнжариясына айналған «Шалқар» радиосы биыл өзінің 50 жылдығын атап өтуде. Осыған орай жыл басынан бері радио басшылығының бастамасымен бірқатар қайырымдылық шаралары өткізілді.

«Шалқар» ұжымы наурыз айында «Тұран-Астана» университетінде Астана қаласындағы балалар үйінің тәрбиеленушілеріне арнап қайырымдылық концертін өткізді.

Сондай-ақ, 27 наурыз – Театр күніне орай Қазақ драма театрлары арасында  «Шалқар шабыт» атты байқау ұйымдастырды. Онда республикалық театр репертуарларынан үздік 12 қойылым таңдап алынып, радионың ресми shalkarfm.kz сайты арқылы  дауыс беру жүргізілді.

Ал, 1 маусым – Балаларды қорғау күніне орай «Шалқар әнім» атты республикалық ән байқауы жарияланды. Ән додасында еліміздің түкпір-түкпірінен келген өнерлі өрендер бас қосып, үздік қатысушылар бағалы сыйлықтармен марапатталды.

Бұдан бөлек, 50 жылдыққа орай үздік әндерді анықтауға арналған «Саз керуен» бағдарламасы эфирге шықты. Ерекшелігі –жобаға кәсіби және әуесқой әншілер ең соңғы шыққан әндерін ұсынады. Жолданған әуен радионың Көркемдік кеңесі арқылы іріктеледі. Ай қорытындысы бойынша shalkarfm.kz сайты арқылы ең көп тыңдалған ән радионың «Алтын қорына» тапсырылады және жылдық байқауға жолдама алады.

«Қолға алынған жобалар мен атқарылған игі істердің барлығы - «Шалқар» радиосының қазақ руханиятына деген қамқорлығы», дейді радионың Бас редакторы Серік Сейітман.

Радио өнімдері қазіргі кезде ел аумағының 62,04 пайызына тарайды. Апта сайын әуе толқынына 75 радиохабар шығады. 

Олардың ішінде музыка - 54%, танымдық хабарлар -10 %-ды, әдеби-музыкалық хабарлар - 20 %-ды, мәдени-сауықтық бағдарламалар – 10 %-ды, «Алтын қор» хабарлары -  3 және жарнама 3 %-ды құрайды.

Тыңдармандар әр аптаның дүйсенбі-жұма күндері аралығында тікелей толқында өтетін «Таңжарық», «Елім менің», «Ұшқын» бағдарламалары арқылы ой-пікірлерімен бөлісіп келеді.

Радио эфирінен аптасына бір рет берілетін мәдени-танымдық «Әлқисса», «Біздің елдің жігіттері», «Дәстүр», «Жақсының жары», «Зиялы қауым», «Парыз», сондай-ақ, әдеби-музыкалық  «Түркі сазы», «Наридірген», «Күй-шежіре», «Шабыт», «Аққулы айдын» сынды хабарлар бүгінде көпшілік сұранысына ие.

Қазақ әдебиетінің сүбелі шығармаларын, ұлттық музыкасын, ғасырлар қойнауынан жеткен ғұламалар ғибратын кеңінен насихаттауды мақсат тұтқан арна әлі де сол қалпынан жаңылған жоқ.

Радио 2012 жылдан бастап Астана қаласындағы заманауи үлгіде салынған «Қазмедиа орталығынан» хабар таратып келеді.