Марат Ілиясов: Бауыржан Момышұлы мені Евгений Брусиловскийдің немересі деп атаған


11:43, 4 ақпан 2019   78


Ақпанның екінші жұлдызында «Есіл дәуреннің есті әндері» хабары жарыққа шықты. Бағдарламаға «Қазақы дастархан», «Ерлікке ескерткіш», «Балуан Шолақ», «Мен саған өкпелемеймін», «Құштарым сен», «Арманға бірге барайық»,«Аққуымды аяла»,«Мерекем сен», «Сұлуым», «Сезім» сияқты әндерімен танылған композитор, ҚР Еңбек сіңірген қайраткері Марат Ілиясов қонаққа келді. 
Композитор қазір Астана қаласында «Қазақстан» телерадиокорпорациясында қызмет етіп жүр. Ол қазақ телевизиясының қарашаңырағында 35 жылға жуық қызмет еткенін айтты.  
Бауыржан Момышұлы композиторды «Евгений Брусиловскийдің немересі» деп атаған.  Сазгер Әсет Бейсеуов «Батыр Бауыржан» деген операны жазып, Бауыржан Момышұлының туған күніне сыйға тартқанына куә болғанын айтты. Осы операның әлі де қойылмай, жарыққа шықпай жүргеніне қапалы екенін жеткізді. 


«Мені танымал еткен ән – «Қазақы дастарханым», Марқұм Мәдина Ералиева осы әнді Түркия, Моңғолияда шырқады. Шет елдегі қандастарымыздың гимніне айналып кетті деуге болады» деді Ілиясов. 
Сөз соңында «Мұхтар Әуезовтің баянын әлі де сақтап келемін. Алматыдағы студияма қойып қойдым» деп сыр бөлісті.

Шалқар радиосы

Байланыс телефондары:

«Шалқар» радиосының 50 жылдығы қайырымдылық шараларымен өтуде

Қазақ халқының мәдени, рухани құндылықтарын насихаттау арқылы ұлттың үнжариясына айналған «Шалқар» радиосы биыл өзінің 50 жылдығын атап өтуде. Осыған орай жыл басынан бері радио басшылығының бастамасымен бірқатар қайырымдылық шаралары өткізілді.

«Шалқар» ұжымы наурыз айында «Тұран-Астана» университетінде Астана қаласындағы балалар үйінің тәрбиеленушілеріне арнап қайырымдылық концертін өткізді.

Сондай-ақ, 27 наурыз – Театр күніне орай Қазақ драма театрлары арасында  «Шалқар шабыт» атты байқау ұйымдастырды. Онда республикалық театр репертуарларынан үздік 12 қойылым таңдап алынып, радионың ресми shalkarfm.kz сайты арқылы  дауыс беру жүргізілді.

Ал, 1 маусым – Балаларды қорғау күніне орай «Шалқар әнім» атты республикалық ән байқауы жарияланды. Ән додасында еліміздің түкпір-түкпірінен келген өнерлі өрендер бас қосып, үздік қатысушылар бағалы сыйлықтармен марапатталды.

Бұдан бөлек, 50 жылдыққа орай үздік әндерді анықтауға арналған «Саз керуен» бағдарламасы эфирге шықты. Ерекшелігі –жобаға кәсіби және әуесқой әншілер ең соңғы шыққан әндерін ұсынады. Жолданған әуен радионың Көркемдік кеңесі арқылы іріктеледі. Ай қорытындысы бойынша shalkarfm.kz сайты арқылы ең көп тыңдалған ән радионың «Алтын қорына» тапсырылады және жылдық байқауға жолдама алады.

«Қолға алынған жобалар мен атқарылған игі істердің барлығы - «Шалқар» радиосының қазақ руханиятына деген қамқорлығы», дейді радионың Бас редакторы Серік Сейітман.

Радио өнімдері қазіргі кезде ел аумағының 62,04 пайызына тарайды. Апта сайын әуе толқынына 75 радиохабар шығады. 

Олардың ішінде музыка - 54%, танымдық хабарлар -10 %-ды, әдеби-музыкалық хабарлар - 20 %-ды, мәдени-сауықтық бағдарламалар – 10 %-ды, «Алтын қор» хабарлары -  3 және жарнама 3 %-ды құрайды.

Тыңдармандар әр аптаның дүйсенбі-жұма күндері аралығында тікелей толқында өтетін «Таңжарық», «Елім менің», «Ұшқын» бағдарламалары арқылы ой-пікірлерімен бөлісіп келеді.

Радио эфирінен аптасына бір рет берілетін мәдени-танымдық «Әлқисса», «Біздің елдің жігіттері», «Дәстүр», «Жақсының жары», «Зиялы қауым», «Парыз», сондай-ақ, әдеби-музыкалық  «Түркі сазы», «Наридірген», «Күй-шежіре», «Шабыт», «Аққулы айдын» сынды хабарлар бүгінде көпшілік сұранысына ие.

Қазақ әдебиетінің сүбелі шығармаларын, ұлттық музыкасын, ғасырлар қойнауынан жеткен ғұламалар ғибратын кеңінен насихаттауды мақсат тұтқан арна әлі де сол қалпынан жаңылған жоқ.

Радио 2012 жылдан бастап Астана қаласындағы заманауи үлгіде салынған «Қазмедиа орталығынан» хабар таратып келеді.