«Киелі Қазақстан» айдары жарыққа шықты

Мемлекет басшысы Нұрсұлтан Назарбаев: «Болашаққа бағдар: рухани жаңғыру» атты бағдарламалық мақаласында «Жергілікті нысандар мен елді мекендерге бағытталған «Туған жер» бағдарламасынан бөлек, біз халықтың санасына одан да маңыздырақ-жалпыұлттық қасиетті орындар ұғымын сіңіруіміз керек. Ол үшін «Қазақстанның қасиетті рухани құндылықтары» немесе «Қазақстанның киелі жерлерінің географиясы» жобасы керек» деген болатын. Елбасымыз Нұрсұлтан Назарбаев «Болашаққа бағдар: рухани жаңғыру» атты бағдарламалық мақаласында Қазақстанның қасиетті рухани құндылықтарын халық санасына сіңірудің ерекше маңыздылығын айтып өткен болатын. Осы бағдарламаның негізінде Қазақстанның 100 қасиетті орындары мен кешендерінің тізімі анықталып, «Киелі Қазақстан» жобасы қолға алынды.


15:10, 6 наурыз 2019   96

«Шалқар» радиосы «Қасиетті Қазақстан» ғылыми-зерттеу орталығымен бірлесе отырып, «Киелі Қазақстан» айдарымен еліміздің әр өңірінен жалпыұлттық  қасиетті  нысандар  қатарына  енген киелі мекендер туралы аңыздардан өрілген тың жобаны әр  аптаның дүйсенбі,  сәрсенбі күндері  назарларыңызға  ұсынады.

Осы  мақсатта,  қазіргі  кезде жалпыұлттық  деңгейлі 100 нысан мен кешендер тізімге  енді. Еліміздегі барлық қасиетті нысандар бес  топқа жіктелді:

1.Ерекше бағаланатын табиғи мұра ескерткіштері. Ел аузында киелі аталып  кеткен, кейбіреуі қазірдің  өзінде мемлекет қарауында  тұрған табиғат  құбылыстарының нәтижесінде пайда  болған  орындар.

2. Археологиялық ескерткіштер және  орта ғасырлық қалалық  орталықтар. Бұл  топқа қалашықтар, бекіністер, петроглифтер, қорымдар, халқымыздың  қалыптасуында ерекше рөл  атқарған, Қазақ  мемлекетінің, Ұлы  Жібек жолының құрылуына  ұйтқы  болған ортағасырлық қалалар  кіреді.

3.Діни және ғибадат орындары болып табылатын  орындар. Бұндай қасиетті орындарды әулие феноменімен байланыстыруға болады. Түркі  кезеңіне дейінгі дәуірдегі аттары аңызға  айналған, көне  түркі  дәуірі  және  орта  ғасырлардағы, сонымен  бірге XIX  ғасыр  аяғы – XX ырдың басына дейінгі  тарихи  тұлғаларды  қамтиды.

4.Тарихи тұлғаларға қатысты  қасиетті  орындар. Қазақстан  тарихында  елеулі  орын  алатын, бүкіл  өмірін  қазақ  елінің  бостандығы  мен егемендігіне  арнап,  үш  жүздің  батыр-билерін  жиып, елдік  маңызды  мәселелерді  шешкен  хандар, қазақ  хандығының тәуелсіздігі  үшін  күрескен қазақтың  батырлары, ұлт-азаттық  қозғалысының  жетекшілері, қолбасшылар, ғылым  мен білімге, мәдениетке үлес  қосқан мемлекет  және  қоғам  қайраткерлері, ақындар,  ғалымдар,  ағартушылар  туралы  мәні зор  орындар алынып  отыр.

5. Саяси, тарихи оқиғаларға  байланысты  қасиетті  орындар. Қазақ  даласында  қазақ  халқының  бірлігі  үшін  болған  шайқастарды,  ерлікті, батырлықты, қайсарлықты  насихаттайтын, елдің  бірлігін білдіретін ескерткіштер  мен ел  жадында  өшпес із  қалдырған  қасіретті  орындар  мен  қоғамның,  мемлекеттің  тарихында  ерекше  орны  бар мемлекетіміздің  жаңа  нышандары еніп  отыр.

Хакім Абай:  «Қара жер адамзатқа болған мекен, Қазына іші толған әртүрлі кен, Ішінде жүз мың түрлі асылы бар», деп текке  айтпаса керек. Кең   дала,  қасиетті құт-мекен  халықтың  рухани  байлығы.

Шалқар радиосы

Байланыс телефондары:

1966 жылы 1 қаңтарда «Шалқар» ұлттық арнасы ақпаратты-сазды «Шалқар» бағдарламасы ретінде тұсауын кесті.

1998 жылы жұмысын уақытша тоқтатқанымен, 2002 жылы қайта ашылып, алғашында тек Алматы қаласында ғана хабар таратты. Кейіннен эфир уақыты ұлғайып, республика аумағына тарай бастады.

2011 жылы 18 шілдеден бастап «Шалқар» радиосының shalqar.fm ресми сайты ақпарат таратады.

2012 жылы радио Астана қаласындағы заманауи үлгіде салынған «Қазмедиа орталығына» көшті. Заман талабына сай сандық технология орнатылған. Мұны игеру арқылы радио мультимедия сапына қосылды.

2014 жылдың ақпан айынан бастап жеке радио болып қайта құрылды. Бұған дейін Қазақ радиосының құрамдас бір бөлігі ретінде редакция болып келген.

Радио өнімдері қазіргі кезде республика аумағының 64%-на тарайды.

«Шалқар» ұлттық радиосы – республикадағы тек қана қазақ тілінде хабар тарататын жалғыз арна.

«Шалқар» ұлттық радиосының басты мақсаты – қазақ халқының ұлттық, рухани құндылықтарын насихаттау. Алғаш ашылғанда «Өнерім-өмірім», «Атадан қалған асыл сөз», «Жеті ғасыр жырлайды», «Алтын тамыр» сынды бағдарламалар арқылы тыңдарман жүрегіне жол тапты.

Қазақ әдебиетінің сүбелі шығармаларын, ұлттық музыкасын, ғасырлар қойнауынан жеткен ғұламалар ғибратын кеңінен насихаттауды мақсат тұтқан радио «Ән домбыра», «Қазақтың 1000 күйі», «Дәуір сазы», «Құтты қонақ», «Бозжусан», «Айтыс ақтаңгері», «Қазақы әңгіме», «Отанды сүю», «Дәстүр», «Бесігіңді түзе», «Құс жолы», «Қауырсын ғалам», «Күй шашу» «Жақсының жары» сынды хабарларын ұсынып келеді.

Сондай-ақ, «Замана бұлбұлдары» айдарынан Жүсіпбек Елебеков, Жәнібек Кәрменов, «Бізге қымбат дауыстар» айдарынан Жамал Омарова, Роза Бағланова сынды саңлақтардың концерттері берілуде. Өнер дүлдүлдерінің үнтаспаға жазылып алынған шығармаларын тұрақты түрде беру дәстүрге айналған. Сондықтан да «Шалқар» ұлттық арнасы арқылы таралатын музыкалық хабарлардың маңызы зор, көтеретін жүгі ауыр.

Радиода әр жылдары белгілі журналистер М.Жантикин, Е.Әбдіғапаров, Т.Рсаев, У.Қыдырханов, Е.Қашқынов, Ғ.Есенсариев, А.Еңсебайұлы, Т.Момбекұлы, Ғ.Игісін, Д.Исабеков, Д. Қанатбаев, талантты дикторлар С.Жақанова, О.Қалмырзаев, Ұ.Бармашқызы жұмыс істеді.