Астана күніне орай Елбасының кітапханасында мерекелік онкүндік басталады

12:20, 1 шілде 2017   314

Елбасының кітапханасында «Ашық есік күндері» мерекелік онкүндігі салтанатты түрде ашылады. Шара елордамыздың туған күніне орай ұйымдастырылған.

Онкүндіктің ашылу салтанатына Олимпиада чемпионы, ҚР Парламенті Мәжілісінің депутаты Серік Сәпиев, ҚР еңбек сіңірген әртісі, әйгілі опера әншiсi Майра Мұхамедқызы, Қазақстанның Тұңғыш Президенті Қорының лауреаты,  атақты балет әртісі Досжан Табылды және мемлекеттік органдардың өкілдері, мәдениет пен спорт қайраткерлері, елордамыздың тұрғындары мен меймандары қатысады.       

Онкүндіктің ашылу бағдарламасында Астана күніне орай ұйымдастырылған көрме мен экспозициялар бойынша экскурсиялар, «Қазақ концерті» оркестрі мен түрлі байқаулардың жеңімпазы атанған әншілер мен бишілердің орындауындағы музыкалық бағдарлама, зияткерлік ойындар мен викториналар жоспарланған.  

Онкүндік барысында бұқаралық, мәдени-танымдық шаралар жоспарланған. Кітапханаға келушілер үшін «Елбасы және Астана» тақырыбында бірегей әрі кешенді көрме ұйымдастырылған. Онда көпшіліктің назарына 60 басылым, 47 архив материалдары, музей жинағынан 30 жәдігер ұсынылады. Көрме негізгі 3 бөлімнен тұрады: «Астананың қалыптасуы», «Астананың қайталанбас бейнесі» және «Астана – әлемдік үнқатысу алаңы».  Барлық материалдар бас қаланың қалыптасу кезеңдерін және оны дамытуда Елбасының өлшеусіз еңбегін паш етеді.   

Өзіндік көзқарасы бар әуесқой фотосуретшілер анықталмақ. «Мәңгілік ел» салтанат қақпасы қазақстандықтардың көзімен» тақырыбындағы фотобайқаудың жеңімпаздары марапатталады. Оның барысында еліміздің тұрғындары жолдаған ең үздік жұмыстар паш етіледі.

Онкүндік аясында білімін сынауға ниет білдіргендер үшін «iDos» гид-роботы зияткерлік викторина өткізіп, мінсіз жауап бергендерге сертификат табыстайды.

Еңселі елорданың аяққа нық тұруы мен дамуы 3 шілде күні «Астана – Қазақстанның стратегиялық векторы» дөңгелек үстеліне арқау болмақ. Маңызды басқосуда өздерінің деректері мен дәйектерін халық қалаулылары, сарапшылар мен ғалымдар ортаға салады.

Қазақстандық жас дарындар өздерінің өнерлерін «Жұлдызды қала – Астана» балалар мерекесінде 4 шілде күні сағат 10.00-де паш етеді.

3 және 5 шілде күндері Кітапхана қабырғасында Кино күндері өтеді.  Оның барысында «Елбасы жолы»  киноэпопеясының фильмдері көрсетіледі.  

Онкүндік шілденің 1-нен 10-на дейін жалғасады. Оның аясында тақырыптық және шолу экскурсиялары өткізіледі.  

Шалқар радиосы

Байланыс телефондары:

«Шалқар» радиосының 50 жылдығы қайырымдылық шараларымен өтуде

Қазақ халқының мәдени, рухани құндылықтарын насихаттау арқылы ұлттың үнжариясына айналған «Шалқар» радиосы биыл өзінің 50 жылдығын атап өтуде. Осыған орай жыл басынан бері радио басшылығының бастамасымен бірқатар қайырымдылық шаралары өткізілді.

«Шалқар» ұжымы наурыз айында «Тұран-Астана» университетінде Астана қаласындағы балалар үйінің тәрбиеленушілеріне арнап қайырымдылық концертін өткізді.

Сондай-ақ, 27 наурыз – Театр күніне орай Қазақ драма театрлары арасында  «Шалқар шабыт» атты байқау ұйымдастырды. Онда республикалық театр репертуарларынан үздік 12 қойылым таңдап алынып, радионың ресми shalkarfm.kz сайты арқылы  дауыс беру жүргізілді.

Ал, 1 маусым – Балаларды қорғау күніне орай «Шалқар әнім» атты республикалық ән байқауы жарияланды. Ән додасында еліміздің түкпір-түкпірінен келген өнерлі өрендер бас қосып, үздік қатысушылар бағалы сыйлықтармен марапатталды.

Бұдан бөлек, 50 жылдыққа орай үздік әндерді анықтауға арналған «Саз керуен» бағдарламасы эфирге шықты. Ерекшелігі –жобаға кәсіби және әуесқой әншілер ең соңғы шыққан әндерін ұсынады. Жолданған әуен радионың Көркемдік кеңесі арқылы іріктеледі. Ай қорытындысы бойынша shalkarfm.kz сайты арқылы ең көп тыңдалған ән радионың «Алтын қорына» тапсырылады және жылдық байқауға жолдама алады.

«Қолға алынған жобалар мен атқарылған игі істердің барлығы - «Шалқар» радиосының қазақ руханиятына деген қамқорлығы», дейді радионың Бас редакторы Серік Сейітман.

Радио өнімдері қазіргі кезде ел аумағының 62,04 пайызына тарайды. Апта сайын әуе толқынына 75 радиохабар шығады. 

Олардың ішінде музыка - 54%, танымдық хабарлар -10 %-ды, әдеби-музыкалық хабарлар - 20 %-ды, мәдени-сауықтық бағдарламалар – 10 %-ды, «Алтын қор» хабарлары -  3 және жарнама 3 %-ды құрайды.

Тыңдармандар әр аптаның дүйсенбі-жұма күндері аралығында тікелей толқында өтетін «Таңжарық», «Елім менің», «Ұшқын» бағдарламалары арқылы ой-пікірлерімен бөлісіп келеді.

Радио эфирінен аптасына бір рет берілетін мәдени-танымдық «Әлқисса», «Біздің елдің жігіттері», «Дәстүр», «Жақсының жары», «Зиялы қауым», «Парыз», сондай-ақ, әдеби-музыкалық  «Түркі сазы», «Наридірген», «Күй-шежіре», «Шабыт», «Аққулы айдын» сынды хабарлар бүгінде көпшілік сұранысына ие.

Қазақ әдебиетінің сүбелі шығармаларын, ұлттық музыкасын, ғасырлар қойнауынан жеткен ғұламалар ғибратын кеңінен насихаттауды мақсат тұтқан арна әлі де сол қалпынан жаңылған жоқ.

Радио 2012 жылдан бастап Астана қаласындағы заманауи үлгіде салынған «Қазмедиа орталығынан» хабар таратып келеді.